ពាក្យចចាមអារ៉ាមធៀបនឹង ការពិត៖ ជំនួយគ្រោះមហន្តរាយ FEMA

1. ក្នុងអំឡុងគ្រោះមហន្តរាយ ពាក្យចចាមអារ៉ាមអំពី FEMA អាចត្រូវបានសាយភាយដែលទីបំផុតអាចបំបាក់ទឹកចិត្តអ្នករស់រានមានជីវិតមិនឱ្យទទួលបានជំនួយដែលពួកគេត្រូវការ។ មធ្យោបាយដ៏ល្អបំផុតដើម្បីកែតម្រូវព័ត៌មានមិនពិត គឺត្រូវទទួលការពិតអំពីតួនាទីរបស់ FEMA ក្នុងជំនួយគ្រោះមហន្តរាយ។ ខាងក្រោមនេះ យើងដោះស្រាយពាក្យចចាមអារ៉ាមមួយចំនួនដើម្បីជួយអ្នករស់រានមានជីវិតពីភ្លើងឆេះព្រៃខោនធី Los Angeles អាចបែងចែកការពិតពីការប្រឌិត។
   1. ពាក្យចចាមអារ៉ាម៖ ប្រសិនបើខ្ញុំមានការធានារ៉ាប់រង នោះ FEMA នឹងមិនអាចផ្តល់ជំនួយដល់ខ្ញុំទេ។

ការពិត៖ FEMA លើកទឹកចិត្តអ្នករស់រានមានជីវិតដែលមានធានារ៉ាប់រងឱ្យដាក់ពាក្យស្នើសុំ។ FEMA មិនចម្លងជំនួយសម្រាប់ការខូចខាតដែលបានរ៉ាប់រងដោយការធានារ៉ាប់រងទេ ប៉ុន្តែអាចធានារ៉ាប់រងលើការខាតបង់ផ្សេងទៀតដែលមិនមានការធានារ៉ាប់រង។ ប្រសិនបើមានអត្ថប្រយោជន៍ស្ទួន អ្នកអាចត្រូវបានទាមទារឱ្យសងជំនួយ FEMA មកវិញ។ សម្រាប់ព័ត៌មានបន្ថែម អ្នកអាចូលមើល តើខ្ញុំអាចទទួលបានជំនួយ FEMA ប្រសិនបើខ្ញុំមានការធានារ៉ាប់រងដែរឬទេ?

2. ពាក្យចចាមអារ៉ាម៖  ខ្ញុំត្រូវតែបន្ថែមការបដិសេធមិនទទួលខុសត្រូវចំពោះទំព័ររៃអង្គាសប្រាក់របស់ខ្ញុំ ដោយបញ្ជាក់ថា ប្រាក់ដែលបានរៃអង្គាសនឹងមិនយកទៅសម្អាតផ្ទះ ឬសាងសង់ឡើងវិញទេ។

ការពិត៖ ជាទូទៅការទទួលបានទឹកប្រាក់ពីមហាជន ឬអំណោយផ្សេងទៀតមិនប៉ះពាល់ដល់ចំនួនទឹកប្រាក់ដែលអ្នករស់រានមានជីវិតនឹងទទួលបានពី FEMA នោះទេ។ ឧទាហរណ៍ ជាទូទៅ FEMA នឹងមិនចាត់ទុកការរៃអង្គាសប្រាក់ "ជួយខ្ញុំរៃអង្គាសប្រាក់សម្រាប់ស្តារឡើងវិញរបស់ខ្ញុំ" ថាជាអត្ថប្រយោជន៍ស្ទួននោះទេ។ ទោះជាយ៉ាងណាក៏ដោយ តាមច្បាប់ FEMA មិនអាចស្ទួនអត្ថប្រយោជន៍ដែលអ្នករស់រានមានជីវិតទទួលបានពីកម្មវិធីរដ្ឋាភិបាលណាមួយ ការទូទាត់ធានារ៉ាប់រង អង្គការមិនរកប្រាក់ចំណេញ ឬប្រភពផ្សេងទៀតឡើយ។ 

ប្រសិនបើអ្នករស់រានមានជីវិតទទួលបានប្រាក់ពីការរៃអង្គាសប្រាក់សម្រាប់ការចំណាយទាក់ទងនឹងគ្រោះមហន្តរាយជាក់លាក់ ពួកគេនឹងមិនអាចទទួលបានជំនួយ FEMA សម្រាប់ការចំណាយដូចគ្នានោះទេ។ ឧទាហរណ៍ ប្រសិនបើអ្នករស់រានមានជីវិតបានទទួលប្រាក់តាមរយៈការប្រមូលមូលនិធិសម្រាប់ "ថ្លៃសណ្ឋាគារ" ហើយអ្នករស់រានមានជីវិតក៏បានស្នើសុំប្រាក់ពី FEMA សម្រាប់ថ្លៃសណ្ឋាគារ នោះ FEMA នឹងត្រូវពិចារណាលើការផ្តល់ទឹកប្រាក់ដែលទទួលបានតាមរយៈការរៃអង្គាសប្រាក់មុនពេលដំណើរការជំនួយសម្រាប់សំណងថ្លៃស្នាក់នៅ។ ប្រសិនបើការបរិច្ចាគពីមហាជន គឺជាភាពស្ទួននៃជំនួយ FEMA នោះអ្នករស់រានមានជីវិតនឹងត្រូវសងប្រាក់ឧបត្ថម្ភ FEMA របស់ពួកគេដែលធានារ៉ាប់រងលើការចំណាយដូចគ្នា។

3. ពាក្យចចាមអារ៉ាម៖ ការទទួលយកជំនួយ FEMA អាចប៉ះពាល់ដល់អត្ថប្រយោជន៍សន្តិសុខសង្គម ពន្ធ ត្រាអាហារ ឬ Medicaid របស់ខ្ញុំ។

ការពិត៖ ជំនួយគ្រោះមហន្តរាយ FEMA មិនមែនជាប្រាក់ចំណូលជាប់ពន្ធទេ ហើយមិនប៉ះពាល់ដល់អត្ថប្រយោជន៍ដែលទទួលបានពីកម្មវិធីសហព័ន្ធផ្សេងទៀតដូចជា សន្តិសុខសង្គម, Medicaid, ឬជំនួយអាហារូបត្ថម្ភបន្ថែមឡើយ។

4. ពាក្យចចាមអារ៉ាម៖ គ្មានអ្វីដែលខ្ញុំអាចធ្វើបានទេ ប្រសិនបើ FEMA និយាយថាខ្ញុំមិនមានសិទ្ធិទទួលបានជំនួយ។

ការពិត៖ លិខិតកំណត់សិទ្ធិទទួលបានរបស់ FEMA មិនមែនជាជាលិខិតបដិសេធទេ។ ក្នុងករណីជាច្រើន FEMA ប្រហែលជាត្រូវការព័ត៌មានបន្ថែមពីអ្នករស់រានមានជីវិត ដើម្បីបន្តដំណើរការពាក្យសុំ។ ប្រសិនបើអ្នករស់រានមានជីវិតមិនយល់ស្របនឹងការសម្រេចចិត្តរបស់ FEMA ទេ ពួកគេអាចប្តឹងឧទ្ធរណ៍បានជានិច្ច។ សម្រាប់ព័ត៌មានអំពីរបៀបប្តឹងឧទ្ធរណ៍ សូមចូលមើល៖ របៀបប្តឹងឧទ្ធរណ៍លើសេចក្តីសម្រេចរបស់ FEMA ។

5. ពាក្យចចាមអារ៉ាម៖ ប្រសិនបើខ្ញុំមិនយល់ស្របនឹងលិខិតសេចក្តីសម្រេចរបស់ FEMA នោះខ្ញុំអាចប្តឹងឧទ្ធរណ៍បានតែម្តងគត់។

ការពិត៖ រាល់ពេលដែលអ្នកដាក់ពាក្យណាម្នាក់ទទួលបានលិខិតសម្រេចចិត្តពី FEMA ពួកគេមានសិទ្ធិប្តឹងឧទ្ធរណ៍បាន។ ជាមួយនឹងលិខិតប្តឹងឧទ្ធរណ៍នីមួយៗ អ្នកដាក់ពាក្យត្រូវតែបញ្ចូលឯកសារថ្មី ដើម្បីគាំទ្រការទាមទាររបស់ពួកគេ ហើយដាក់ស្នើវាក្នុងរយៈពេល 60 ថ្ងៃគិតចាប់ពីកាលបរិច្ឆេទនៅលើលិខិតរបស់ FEMA ។

1. ពាក្យចចាមអារ៉ាម៖ ប្រសិនបើខ្ញុំទទួលបានជំនួយគ្រោះមហន្តរាយពី FEMA នោះខ្ញុំនឹងត្រូវសងវាវិញ។

ការពិត៖ ក្នុងករណីភាគច្រើនបំផុត ទឹកប្រាក់ដែល FEMA ផ្តល់ជូនដល់អ្នករស់រានមានជីវិតពីគ្រោះមហន្តរាយ គឺជាជំនួយដែលមិនចាំបាច់ត្រូវសងវិញទេ។ ទោះជាយ៉ាងណាក៏ដោយ FEMA មិនអាចស្ទួនអត្ថប្រយោជន៍បានទេ។ ឧទាហរណ៍ ប្រសិនបើអ្នករស់រានមានជីវិតទទួលបានការទូទាត់ធានារ៉ាប់រងសម្រាប់ការចំណាយ នោះ FEMA នឹងមិនអាចផ្តល់ទឹកប្រាក់សម្រាប់ការចំណាយដូចគ្នានោះទេ។

ពាក្យចចាមអារ៉ាម៖ ប្រសិនបើខ្ញុំមានការធានារ៉ាប់រង តើខ្ញុំនឹងមានលក្ខណៈសម្បត្តិគ្រប់គ្រាន់សម្រាប់កម្មវិធីយកកម្ទេចកម្ទីចេញរបស់រដ្ឋាភិបាលដែរឬទេ?

ការពិត៖ នៅពេលអ្នករស់រានមានជីវិតជ្រើសរើសចូលរួមទៅក្នុងកម្មវិធី ហើយបំពេញទម្រង់បែបបទសិទ្ធិចូលរួម (Right of Entry, ROE) ដែលតម្រូវឱ្យមានជាមួយខោនធី ពួកគេនឹងត្រូវបានសួរអំពីស្ថានភាពធានារ៉ាប់រងរបស់ពួកគេ។ ប្រសិនបើពួកគេត្រូវបានធានារ៉ាប់រងសម្រាប់ការដកយកចេញនូវកម្ទេចកម្ទី ពួកគេនឹងត្រូវបានស្នើសុំឱ្យយល់ព្រមដើម្បីចាត់ដំណើរការរបស់ការធានារ៉ាប់រងលើការដកយកចេញកម្ទេចកម្ទីទៅឱ្យខោនធី និងបញ្ចេញច្បាប់ចម្លងនៃគោលនយោបាយធានារ៉ាប់រងរបស់ពួកគេទៅកាន់ខោនធី។ ច្បាប់សហព័ន្ធហាមឃាត់អត្ថប្រយោជន៍ស្ទួន ហើយកម្មវិធីត្រូវមានកាតព្វកិច្ចដើម្បីធានាថាមិនមានភាពស្ទួនណាមួយឡើយ។ សម្រាប់ព័ត៌មានបន្ថែមអំពីកម្មវិធីកម្ចាត់កំទេចកំទី សូមចូលទៅកាន់គេហទំព័រកម្ចាត់កំទេចកំទីរបស់ Los Angeles ។

សម្រាប់សំណួរបន្ថែម ដើម្បីដាក់បណ្តឹងឧទ្ធរណ៍ ឬដើម្បីធ្វើបច្ចុប្បន្នភាព នោះអ្នករស់រានមានជីវិតដែលដាក់ពាក្យសុំគួរតែទូរសព្ទទៅលេខ 1800-621-3362 ចូលទៅកាន់ disasterassistance.gov ឬប្រើកម្មវិធី FEMA ។ ជំនួយអាចរកបាន ខណៈពេលដែលអ្នករស់រានមានជីវិតបន្តធ្វើការតាមរយៈដំណើរការសង្គ្រោះ។