HONOLULU – Iti kiddaw ti estado ti Hawaiʻi, inaprobaran ti Pederal nga Ahensia a Mangidadaulo iti Emerhensia (Federal Emergency Management Agency, FEMA) ti maysa a tawen a pannakaituloy ti Programa para kadagiti Indibidual ken Balay (Individuals and Households Program, IHP), a pakairamanan ti Tulong Pinansial (Financial Assistance) ken Direkta a Temporario a Tulong iti Panagpabalay (Direct Temporary Housing Assistance) para kadagiti nakalasat kadagiti uram iti kabakiran iti Maui.
Ti 18 a bulan a damo a panawen ti tulong para iti FEMA IHP ket agpatingga koma idi Pebrero 10, 2025 ngem ita ket maitultuloyen agingga iti Peb. 10, 2026.
Iti sidong ti Robert T. Stafford Disaster Relief and Emergency Assistance Act, mabalin a paatiddogen ti FEMA ti panawen ti tulong gapu kadagiti naisangsangayan a kasasaad. Dagiti uram iti kabakiran idi napan a tawen ti nangpataud iti awan kapadana a pannakadadael iti Lahaina ken nangapektar kadagiti adu a sangakabbalayan, negosio, komunidad ken iti imprastruktura iti Maui.
Ti FEMA ket makitinnulong iti estado ti Hawaii, kadagiti lokal nga opisial, ken kadagiti boluntario tapno matulongan dagiti nakalasat kadagiti temporario a pagtaengan a mangbirok kadagiti permanente a solusion. Ipapaay met dagiti mangimatmaton iti kaso ti didigra ti nai-personalize a tulong.
Immanamong ti FEMA iti Direkta a Panagpaabang (Direct Lease) kas maysa a kita ti Direkta a Temporario a Tulong iti Panagpabalay (Direct Temporary Housing Assistance) idi Septiembre 2023 ken agdama nga addaan iti 1,194 a sangakabbalayan nga agnanaed kadagiti yunit nga ipapaay ti FEMA.
Kabayatan ti napaatiddog a panawen ti panangtulong, dagiti nakalasat nga agtultuloy nga agnaed iti temporario a pagnaedan nga impaay ti FEMA ket manamnama a mangiproseson iti permanente a planoda a pagnaedan ken mangrugidan nga agbayad iti renta, depende iti pinansial a kabaelanda. Ti gatad ti abang ket maibatay iti Nainkalintegan nga Abang iti Merkado (Fair Market Rent) ti Departamento ti Panagibangon ken Urbano a Panagrang-ay iti E.U. (U.S. Department of Housing and Urban Development, HUD).
Mangipatulod ti FEMA kadagiti agnanaed iti nasakbay a pakaammo maipapan iti kasapulan para iti panagabang.
Dagiti agnanaed a mangipaay iti dokumentasion ti sueldoda kalpasan ti didigra a makagaw-at wenno nababbaba ngem iti limitasion ti nababa unay a matgedan ti HUD ket kualipikado iti naan-anay a nababa nga abang a $50 iti kada bulan a di kasapulan ti agapelar ken mangisubmitir iti dokumentasion dagiti gastos iti balay sakbay wenno kalpasan ti didigra.
Dagiti agnanaed nga ad-adu ti sueldoda ngem iti limitasion ti nababa unay a matgedan ti HUD ket masapul laeng a mangipaay iti dokumentasion dagiti gastos iti balay kalpasan ti didigra para iti FEMA tapno maammuanda ti kaadu ti mabayadan a renta a maibatay iti pinansial a kabaelanda.
Mangisayangkat ti FEMA iti outreach tapno matulongan dagiti agnanaed kadagiti temporario a pagnaedan kadagiti dokumentasion a kasapulan tapno matingiting ti kabaelanda nga agbayad. Nadisenio daytoy a panagregget tapno maksayan ti panagkasapulan dagiti agnanaed nga agapelar iti gatad ti abang nga inkeddeng ti FEMA.
Para iti ad-adu pay nga impormasion maipapan iti temporario a pagnaedan, tawagam ti Hotline ti Indibidual a Tulong iti Pagtaengan (Individual Assistance Housing Hotline) iti 808-784-1600. Wenno kontakem ti 2-1-1 tapno madanunmo ti programa a panangtarawidwid iti kaso ti didigra.
Mabalinmo met a tawagan ti FEMA Helpline iti 800-621-3362. Matulongannaka dagiti operator ti helpline iti adu a pagsasao. No agus-usarka iti serbisio ti relay kas iti Video Relay Service, serbisio ti telepono nga addaan kapsion wenno dadduma pay, laglagipem nga ited iti FEMA ti numerom para iti dayta a serbisio no ag-apply-ka.
Mabalinmo ti makagun-od iti personal a tulong iti:
Lahaina Gateway (iti abay ti Ace Hardware)
Maui County Office of Recovery - West Maui
8 a.m. - 4:30 p.m.
CNHA Office (iti abay ti Maui Mall)
Kākoʻo Relief & Aid Services Center
153 E. Kamehameha Ave. Suite 101
Kahului, HI 96732
9 a.m. - 5 p.m.
Para iti kabaruan nga impormasion iti panangikagumaan para iti panagpalaing gapu iti uram ti kabakiran iti Maui, bisitaen ti mauicounty.gov, mauirecovers.org, fema.gov/disaster/4724 and Hawaii Wildfires - YouTube. Suroten ti FEMA iti social media: @FEMARegion9 ken facebook.com/fema. Mabalinmo pay ti makagun-od iti impormasion maipapan iti tulong iti didigra ken i-download dagiti aplikasion iti sba.gov/hawaii-wildfires.