KEV HLOOV KHO TSHIAB RAU FEMA COV KHOOS KAS RAU COV NEEG XIAM OOB QHAB [https://www.fema.gov/hmn/fact-sheet/updates-fema-programs-people-disabilities-1] Release Date: Jun 3, 2024 FEMA thiab Arkansas Feem Hauj Lwm Saib Xyuas Kev Tuav Tswj Xwm Txheej Ti Tes Ti Taw (Division of Emergency Management) tab tom muab kev pab xwm txheej kub ntxhov rau cov neeg xiam oob qhab thiab cov kev xav tau fab kev nkag mus thiab fab kev ua hauj lwm. Tsis tas li xwb, kuj tseem muaj kev pab rau cov neeg uas sib txuas lus ua lwm yam lus uas tsis yog Lus Askiv tib si thiab. Qee cov neeg uas muaj los sis tsis muaj kev xiam oob qhab yuav tuaj yeem muaj cov xwm txheej mob ib vuag los sis mob mus ncua sij hawm ntev uas kuj yuav ua rau lawv xav tau kev pab ntxiv me ntsis tab sis ho tsis xav thov qhov kev pab no. FEMA muab kev pab ntxiv rau cov neeg xws li cov neeg laus, thiab cov neeg uas tsis paub Lus Askiv zoo. Thaum pib lub xyoo no, FEMA tau tshaj tawm txog cov kev hloov kho tshiab txog lub khoos kas kev pab kev puas tsuaj uas muaj nyob rau lub sij hawm uas muaj kev tshaj tawm los ntawm tseem hwv teb chaws. Cov kev hloov pauv no muab kev txhawb pab kev puas tsuaj los ntawm kev ua kom muaj kev nkag tau mus siv thiab kev muaj cai tsim nyog ntau dua qub tuaj rau cov neeg, cov tsev neeg thiab cov zej zog uas tau txais kev cuam tshuam. KEV PAB RAU COV KEV XAV TAU HEEV (SERIOUS NEEDS ASSISTANCE) Hom kev pab no muaj cov khoom tseem ceeb xws li dej, zaub mov, kev pab thaum xub thawj, cov khoom siv pub mis, cov mis hmoov pub me nyuam mos, ntaub daiv pawm, cov khoom siv tu cev ua kev nyiam huv, roj tsheb thauj mus los los sis lwm yam khoom siv ti tes ti taw rau cov tsev neeg muaj cai tsim nyog. Hom kev pab no yog muaj rau hauv txhua yam xwm txheej kev puas tsuaj uas tau tshaj tawm rau Kev Pab Cuam Leej Neeg, suav nrog qhov xwm txheej kev puas tsuaj hauv Arkansas no, thiab muaj rau cov neeg dim siav uas ua ntawv thov hauv thawj 30 hnub tom qab tau tshaj tawm tias muaj xwm txheej kev puas tsuaj lawm, uas yog Lub Tsib Hlis Tim 30, 2024.  Txhawm rau kom muaj cai tsim nyog tau txais SNA, koj yuav tsum yog tus neeg raug rhais chaw nyob, xav tau chaw nyob los sis muaj lwm yam nqi rau xwm txheej ti tes ti taw vim muaj kev puas tsuaj nyob rau hauv koj daim ntawv thov. Tsis tas li xwb, SNA kuj tseem TSEEV KOM YUAV TSUM MUAJ KEV TSHUAJ XYUAS KOM PAUB MEEJ TIAS YEEJ MUAJ CAI TSIM NYOG TAU TXAIS ua ntej yuav muab nyiaj pab rau cov neeg thov.  COV NEEG XIAM OOB QHAB: Qhov no yuav pab cov neeg uas muaj kev pheej hmoo loj dua qub rau fab kev noj qab haus huv thaum kev nkag mus rau cov khoom siv uas cuam tshuam txog kev xiam oob qhab raug ncua qeeb lig.  KEV PAB RAU KEV RHAIS CHAW NYOB Cov neeg tsim nyog Arkansas uas muaj cai tsim nyog uas xav tau vaj tsev nyob kiag tam siv uas tsis tuaj yeem rov qab mus rau lawv tej vaj tsev tuaj yeem tau txais cov nyiaj pab ua ntej los pab fab vaj tse. Cov nyiaj pab no tuaj yeem pab them ntau yam nqi thaum ib tug neeg nrhiav kev xaiv txog kev xauj tsev.  Kev Pab Rau Kev Rhais Chaw Nyob TSEEV KOM YUAV TSUM MUAJ KEV TSHUAJ XYUAS KOM PAUB MEEJ TIAS YEEJ MUAJ CAI TSIM NYOG TAU TXAIS ua ntej yuav muab nyiaj pab rau cov neeg thov.  COV NEEG XIAM OOB QHAB: Qhov nyiaj pab ncua sij hawm luv kiag tam siv no kuj tseem yuav tuaj yeem pab them rau cov kev pab ua kev yooj yim uas tuaj yeem nkag mus tau, xws li cov vaj tsev nyob raws li Tsab Cai Hais Txog Cov Neeg Meskas Xiam Oob Qhab (Americans with Disabilities Act, ADA).  COV CAI RAU DAIM NTAWV THOV QIV NYIAJ Cov neeg Arkansas tsis tas yuav tsum tau ua ntawv thov Teb Chaws Meskas Lub Loos Kam Saib Xyuas Kev Lag Luam Me (U.S. Small Business Administration) qhov nyiaj qiv rau xwm txheej kev puas tsuaj uas laum paj qis ua ntej tau txais kev ntsuam xav rau qee hom ntawm FEMA Qhov Kev Pab Rau Lwm Yam Kev Xav Tau.  COV NEEG XIAM OOB QHAB: Cov neeg Arkansas uas tau txais kev them nyiaj kom sai dua nyob rau tam sim no rau tej kev txhim kho thiab tej khoom tsim nyog, uas yog yam tseem ceeb rau cov neeg xiam oob qhab. Tej zaum lawv yuav tau txais kev them nyiaj sai dua los txhim kho los sis xaj yuav lub tsheb los hloov nrog rau cov cuab yeej txhawb pab. KEV PAB RAU COV NEEG ARKANSAS UAS MUAJ KEV TUAV POV HWM QIS Cov niam txiv pej xeem uas tau txais kev pab them nqi los ntawm kev tuav pov hwm rau kev puas tsuaj rau tej vaj tsev los sis tej khoom ntiag tug uas ploj mus lawm yuav muaj cai tsim nyog tau txais kev pab los ntawm FEMA. Kev pab fab nyiaj txiag tam sim no yuav muaj mus txog qhov siab tshaj plaws ntawm Tsoom Hwv Teb Chaws Txoj Kev Pab Fab Vaj Tsev thiab Kev Pab Rau Lwm Yam Kev Xav Tau uas siab tshaj plaws txhawm rau los them cov nqi kho xwm txheej kev puas tsuaj uas tsis tau txais kev them nyiaj rov qab los ntawm kev tuav pov hwm.  COV NEEG XIAM OOB QHAB: Qhov kev hloov kho no yuav muab kev pab them nqi rau cov neeg xiam oob qhab xws li cov las tuav, cov ntaiv tuam nce, thiab lwm yam kev hloov kho hauv tsev. FEMA yuav tuaj yeem muab kev pab rau cov niam txiv pej xeem uas muaj kev tuav pov hwm qis txhawm rau pab them cov nqi uas cuam tshuam txog kev puas tsuaj uas kev tuav pov hwm tsis them. KEV PAB RAU COV NEEG ARKANSAS UAS UA HAUJ LWM RAU YUS TUS KHEEJ FEMA tab tom ua kom muaj kev yooj yim rau tus txheej txheem rau cov neeg ua hauj lwm rau yus tus kheej. Yav dhau los, cov niam txiv pej xeem yuav tsum tau txais kev pab cuam los ntawm Lub Loos Kam Saib Xyuas Kev Lag Luam Me (SBA) txhawm rau pab hloov cov twj thiab cov cuab yeej uas puas tsuaj los ntawm xwm txheej kev puas tsuaj uas yuav tsum tau muaj rau lawv txoj hauj lwm. COV NEEG XIAM OOB QHAB: Cov neeg Arkansas uas ua hauj lwm rau yus tus kheej los sis muaj lag luam ntiag tug yuav tuaj yeem muaj cai tsim nyog siv FEMA qhov kev pab los pab hloov cov khoom puas uas cuam tshuam rau lawv txoj hauj lwm uas puas tsuaj lawm. TUS QAUV CAI HAIS TXOG KEV TUAJ YEEM SIV UA CHAW NYOB TAU FEMA tau ua kom muaj kev yooj yim rau nws lo lus txhais lub ntsiab lus txog "kev tuaj yeem siv ua chaw nyob tau" kom suav nrog kev txhim kho cov vaj tse uas muaj kev puas tsuaj nyob rau yav dhau los uas tseem puas hnyav tshaj qub tuaj lawm los ntawm qhov xwm txheej kev puas tsuaj.  COV NEEG XIAM OOB QHAB: Qhov no yuav pab cov neeg ua ntawv thov kev kho mob los sis cov kev xav tau ntsig txog kev noj qab haus huv kom tuaj yeem kho lawv lub tsev tau txawm tias nws yeej nyob tsis zoo ua ntej muaj xwm txheej kev puas tsuaj tshwm sim los xij. KEV TXHIM KHO KEV TUAJ YEEM NKAG MUS SIV TAU Cov neeg Arkansas uas xiam oob qhab tuaj yeem siv FEMA cov nyiaj pab los txhim kho qee qhov kev tuaj yeem nkag mus siv tau rau cov tsev uas puas tsuaj los ntawm qhov xwm txheej kev puas tsuaj uas tsoom hwv teb chaws tau tshaj tawm. COV NEEG XIAM OOB QHAB: Cov neeg xiam oob qhab tuaj yeem ua kom lawv lub tsev tuaj yeem nkag tau yooj yim tshjaj li ua ntej yuav muaj xwm txheej kev puas tsuaj ua ntej nrog rau tej khoom tshwj xeeb, xws li tus ntaiv tuam rau lub rooj zaum muaj log, cov las tuav, thiab cov kev pua roj hmab, thiab yuav tsis raug suav nkag rau tsoom hwv teb chaws qhov Kev Pab Fab Vaj Tsev siab tshaj plaws.  DAIM NTAWV THOV KEV PAB FAB VAJ TSEV NYOB IB VUAG FEMA tab tom txo qis cov cai hais txog kev txheeb xyuas rau cov neeg thov uas xav nyob txuas ntxiv mus rau hauv lawv lub vaj tsev nyob ib vuag. COV NEEG XIAM OOB QHAB: Qhov no yuav pab txo qis cov ntaub ntawv uas xav tau rau cov neeg xiam oob qhab uas xav tau kev pab them nyiaj ntau dua rau qhov chaw nyob. TUS TXHEEJ TXHEEM KEV THOV KOM ROV HAIS DUA Cov neeg uas thov kom rov txiav txim dua rau FEMA qhov kev txiav txim siab txog kev muaj cai tsim nyog yuav tsis tas muab daim ntawv thov kom rov txiav txim dua uas sau muaj ntaub muaj ntawv thiab kos npe tag rau lawm, nrog rau cov ntaub ntawv txhawb nqa. COV NEEG XIAM OOB QHAB: Qhov no yuav pab kom cov niam txiv pej xeem uas muaj teeb meem fab kev sib txuas lus tuaj yeem xa cov ntaub ntawv thov kom rov txiav txim dua tau yam tsis tas sau ua ntaub ntawv piav qhia. Tsis tas li xwb, cov neeg Arkansas kuj tseem yuav tuaj yeem xaiv xa FEMA daim foos ua ntawv thov kom rov txiav txim dua tshiab los sis daim ntawv thov kom rov txiav txim dua uas sau muaj ntaub muaj ntawv thiab kos npe rau lawm yog tias lawv xav muab cov ntaub ntawv qhia paub ntau ntxiv. KEV HLOOV KHO TUS VEV XAIB DISASTERASSISTANCE.GOV Kev ua ntawv thov kev pab xwm txheej kev puas tsuaj yog nrawm dua qub tuaj lawm nyob rau tam sim no nrog tus vev xaib DisasterAssistance.gov [https://www.disasterassistance.gov/] uas hloov kho tshiab. Daim ntawv thov hauv oos lais yog siv tau yooj yim dua qub. COV NEEG XIAM OOB QHAB: Cov neeg xiam oob qhab tuaj yeem ua ntawv thov tau yooj yim dua qub uas yog siv tus vev xaib yooj yim thiab pom tseeb dua qub tuaj. Hais txog rau cov ntaub ntawv tshiab tshaj plaws, mus saib fema.gov/disaster/4788 [https://www.fema.gov/disaster/4788]. Soj qab saib FEMA Cheeb Tsam 6 ntawm X.com/FEMARegion6 [https://x.com/FEMARegion6] los sis nyob hauv Facebook ntawm facebook.com/FEMARegion6/ [https://www.facebook.com/FEMARegion6/].