Kom thiaj tsim nyog txais tseem fwv kev pab, cov neeg dim kev puas tsuaj yuav tsum yog pej xeem Amelikas, neeg yug hauv Amelikas ib qho chaw uas tsis yog ib lub xeev, los yog neeg tsis yog pej xeem uas tsim nyog. Cov neeg dim uas tsis tsim nyog txais tseem fwv kev pab lawv tseem hu tau mus rau FEMA Tus Xov Tooj Pab rau ntawm 800-621-3362 kom thiaj raug xa mus rau lwm lub koom haum pab dawb.
Kev pab rau cov neeg dim uas tsim nyog muaj xws li kev pab nrhiav tsev nyob tau ib ntus, kev kho tsev, kho ntiag tug teej tug, kev kho mob, nqi ntees tuag, kev pab nyiaj vim poob hauj lwm ntawm kev puas tsuaj thiab cov nyiaj qiv uas muaj paj qis.
Muaj ntau hom kev pab rov zoo ntawm kev puas tsuaj, xws li kev sib sab laj thaum raug xwm txheej, kev pab lij choj, kev pab tswj hwm dej num, Lub Khoos Kas Yuav Zaub Mov Thaum Raug Kev Puas Tsuaj (D-SNAP), thiab kev pab uas tsis yog nyiaj txiag xws li kev pab tshawb nrhiav thiab cawm dim, kev kho mob, chaw nyob, zaub mov noj thiab dej haus, muaj tag nrho kev pab no rau cov tib neeg thiab tsev neeg dim, txawm lawv yog pej xeem los tsis yog los xij.
Cov neeg tsis yog pej xeem uas tsim nyog txhais tias:
- Cov neeg nyob no raws txoj cai (muaj “npav ntsuab”).
- Cov tsis yog pej xeem uas txais kev pom zoo nyob no khiav kev tsim txom ntawm lwm qhov.
- Cov neeg thoj nam.
- Ib tug neeg twg uas qhov raug ntiab tawm raug cheem tau ib xyoos ntau.
- Ib tug neeg twg uas nyob hauv teb chaws Amelikas los pab neeg pub dawb tau ntau dua ib xyoos.
- Qee leej Cuba/Haiti.
- Cov neeg raug tsim txom uas tsis yog pej xeem, los yog lawv tus txij nkawm los cov me nyuam.
- Cov neeg raug txeeb mus muag ua qhev rau kev plees kev yi.
Yog hais tias ib tug neeg dim kev puas tsuaj tsis tsim nyog raws li cov lus txog kev ua pej xeem no, lawv tseem tso npe tau rau kev pab thiab tej zaum yuav txais tau kev pab yog:
- Tus niam txiv los yog neeg saib xyuas raws li txoj cai rau ib tug me nyuam uas yog pej xeem Amelikas, yug los rau hauv Amelikas ib qho chaw uas tsis yog lub xeev, los yog neeg tsis yog pej xeem tsim nyog, yog tso npe sawv cev tam rau tus me nyuam thiab nyob rau hauv tib lub tsev. Tus niam txiv/neeg saib xyuas no yuav tsum koom tes tso npe, thiab tus me nyuam yuav tsum yog hluas dua 18 thaum raug kev puas tsuaj puas ntsoog.
Muaj ntau theem ntawm cov neeg uas tsis yog pej xeem uas nyob rau hauv lub teb chaws Amelikas uas tsis tsim nyog txais kev pab, xws li cov tub ntxhais kawm ntawv ntawm lwm lub teb chaws thiab cov neeg tuaj no tau ib ntu ua hauj lwm.
- Yuav tsum ua ntawv pov thawj txog kev nyob rau hauv lub tsev raug thiab kev ua tswv rau lub tsev ntawd rau tej hom kev pab thiab tus neeg tso npe yuav tsum tsim nyog raws li FEMA cov lus txib txog kev ua pej xeem. Thaum twg yus sawv ib tug me nyuam cev tam tso npe rau nws, ces yuav tsum coj raws li cov lus txib no:
- Kev nyob hauv tsev: Tus neeg koom tes tso npe yuav tsum yog tus me nyuam niam txiv los yog neeg saib xyuas raws li txoj cai thiab ua ntawv pov thawj tias lub tsev uas raug kev puas tsuaj ntawd twb yog lub uas lawv nyob rau haud.
- Kev ua tswv tsev: Tus neeg koom tes tso npe yuav tsum yog tus me nyuam niam txiv los yog neeg saib xyuas raws li txoj cai thiab ua ntawv pov thawj tias lawv yog tus tswv rau lub tsev raug kev puas tsuaj.
Tag nrho kev pab cuam rov zoo ntawm kev puas tsuaj yuav muab pub dawb tsis xaiv ntsej muag raws li haiv neeg, nqaij xim, kev ua poj txiv (suav nrog kev xum ua poj txiv twg), kev teev ntuj, yug teb chawg twg tuaj, hnub nyoog, kev ua tsis taus, kev txawj hais lus Askiv, los yog seb muaj nyiaj ntaum npaum li cas. Yog ib tug neeg dim ntseeg hais tias lawv raug ntsej muag xaiv, ces lawv hu tau mus rau FEMA Tus Xov Tooj Pab. Yog nws siv lub cuab yeej pab tham xov tooj, xws li lub cuab yeej yees duab thaum tham (VRS), lub cuab yeej sau ntawv thaum hais lus los yog lwm yam kev pab cuam, ces tus neeg dim yuav tau muab nws tus lej rau kev pab cuam ntawd pub rau FEMA.