Kev Pab Thaum Poob Hauj Lwm Ntawm Kev Puas Tsuaj

Release Date:
Lub Kaum Ib Hlis Ntuj 5, 2024

Lub khoos kas Pab Thaum Poob Hauj Lwm Ntawm Kev Puas Tsuaj (DUA) yog muab pub rau cov tseem fwv hauv lub xeev, lub xub, thiab lub cheeb tsam (STT) thaum lub teb chaws Tus Thawj Tswj Hwm tshaj tawm txog kev puas tsuaj uas muaj kev Pab Tib Neeg thiab pub cai siv DUA, raws li tshooj 410 hauv txoj cai Robert T. Stafford Disaster Relief and Emergency Assistance Act (Txoj Cai Pab Thaum Raug Kev Puas Tsuaj), Txoj Cai Publi Law 93-288, raws li tau muab ua txoj cai 42 U.S.C. § 5177. DUA yuav muab kev pab txiaj ntsig rau cov neeg uas plam txoj hauj lwm vim raug kev puas tsuaj thiab tsis tsim nyog txais lub xeev cov txiaj ntsig thaum plam txoj hauj lwm.

Nrog rau FEMA, lub koom haum U.S. Department of Labor yuav saib xyuas lub khoos kas DUA. Tom qab Tus Thawj Tswj Hwm tshaj tawm txog ib qho kev puas tsuaj mas, FEMA yuav pub cov nyiaj mus rau U.S. Department of Labor kom them cov txiaj ntsig DUA thiab yuav pub nyiaj rov qab rau lub xeev rau cov nqi tswj hwm ntawm cov txiaj ntsig DUA. Tus Tuav Ntaub Ntawv Loj Tshaj ntawm lub koom haum U.S. Department of Labor yog tus lav ris saib xyuas lub khoos kas DUA thiab kev them txiaj ntsig DUA no. Cov ntsiab cai tswj hwm DUA nyob ntawm 20. C.F.R. Feem 625.

Lub koom haum saib xyuas kev poob hauj lwm ntawm lub xeev los yog lub xub[1] yog cov uas saib xyuas lub khoos kas DUA. Thaum txais nyiaj lawm, lub koom haum no yuav pib tshaj tawm rau sawv daws rau hauv lub cheeb tsam raug kev puas tsuaj ntawd kom lawv paub txog lub khoos kas no. Cov nyiaj uas them no yuav them tau 26 lub lim tiam txij thaum hnub tim uas tshaj tawm txog kev puas tsuaj, tsuas yog qhov uas tus tib neeg ntawd tau poob hauj lwm vim raug kev puas tsuaj.

 

Cov Lus Txib Rau Sawv Daws

Kom thiaj tsim nyog txais kev pab DUA no, cov tib neeg yuav tsum:

  • Muaj ntawv ua pov thawj txog lawv tus kheej.
  • Ua ib tug neeg pej xeem Amelikas, neeg yug hauv Amelikas ib qho chaw uas tsis yog ib lub xeev, los yog ib tug neeg tsis yog pej xeem tsim nyog.
  • Tso ntawv rau kev pab DUA mus rau lub koom haum hauv zej zog uas saib xyuas lub khoos kas no ua ntej dhau 30 hnub txij thaum tshaj tawm rau pej xeem tias muaj lub khoos kas no lawm[2].
  • Tsis tsim nyog txais cov txiaj ntsig thaum poob hauj lwm ntawm lub xeev.
  • Poob hauj lwm tag nrho los yog ib feem vim raug kev puas tsuaj.
  • Muaj peev xwm ua hauj lwm, tsuas yog yus raug mob ntawm kev puas tsuaj (saib cov lus piav nram qab no).
  • Tsis tau xyeej ib qho hauj lwm twg uas zoo rau yus.

Cov Lus Txog Kev Poob Hauj Lwm

Cov neeg tso npe yuav tsum phim ib qho nram qab no rau ntawm fab poob hauj lwm los yog fab tsis muaj peev xwv ua hauj lwm rau tus kheej vim raug kev puas tsuaj:

  • Tus tib neeg twb poob hauj lwm ib lub lim tiam ntau txij thaum raug kev puas tsuaj.
  • Tus tib neeg tsis muaj peev xwm mus txog lawv qhov chaw ua hauj lwm.
  • Tus tib neeg twb yuav pib ua hauj lwm tiam sis txoj hauj lwm ntawd pawv lawm vim raug kev puas tsuaj, los yog tus tib neeg nws mus tsis txog qhov chaw ua hauj lwm ntawd.
  • Tus tib neeg txawm ua tus hlob hauv tsev vim tus qub hlob twb tas sim neej vim raug kev puas tsuaj.
  • Tus tib neeg ua hauj lwm tsis taus vim raug kev puas tsuaj.
  • Tus tib neeg poob hauj lwm los yog poob nyiaj txiag thaum tus tswv hauj lwm (los yog yus li lub lag luam) xiam nyiaj txiag ntau heev ntawm ib lub lag luam rau hauv qhov chaw uas raug kev puas tsuaj ntawd es lub lag luam ntawd raug me ntsis, raug puas tsuaj tag nrho, los yog raug kaw ntawm tseem fwv loj, xeev, los yog lub zos vim rau qhov kev puas tsuaj ntawd.

Qhov uas xiam nyiaj ntau vim yus ntiag tug teej tug raug lawm los yog yus cov qoob loo raug lawm tsis txhais hais tias tsim nyog txais cov txiaj ntsig DUA. Cov neeg tso npe yuav tsum coj raws li cov lus qhia rau hauv cov ntawv tshaj tawm thiab tso ntawv mus rau DUA raws li lub koom haum tswj hwm lub khoos kas DUA qhia (piv xam li tim ntsej tim muag, xa ntawv, dhau lub xov tooj, los yog saum huab cua).

Cov tib neeg uas tau tsiv tsev los yog khiav mus rau lwm lub xeev, lub xub, los yog lwm lub cheeb tsam yuav tau tiv tuaj mus rau lub koom haum tswj hwm kev poob hauj lwm cov txiaj ntsig nyob hauv lawv qhov chaw tam sim no kom saib seb lawv yuav tso npe li cas.

Kom thiaj kawm ntxiv txog lub khoos kas DUA, tiv tauj mus rau U.S. Department of Labor nyob ntawm 1-866-487-2365 los yog koj lub xeev los lub cheeb tsam qhov chaw tswj hwm kev poob hauj lwm cov txiaj ntsig los yog mus saib qhov vev xaib Department of Labor.

Cov Dej Num thiab Kev Lav Ris

Kev Tsis Xaiv Ntsej Muag

Yuav muab FEMA txhua hom kev pab rov zoo ntawm kev puas tsuaj pub rau txhua tus neeg tsim nyog. Tsis muaj ib lub koom haum tseem fwv los yog neeg ua hauj lwm uas xaiv tau ntsej muag nkaug ib tug neeg twg raws li lawv haiv neeg, nqaij xim, kev teev ntuj, hnub nyoog, yug teb chaws twg tuaj, kev ua poj txiv, kev ua tsis taus, kev txawj hais lus Askiv, los yog vim muaj nyiaj los tsis muaj los xij.

Cov Ntaub Ntawv

Cov tib neeg yuav tsum muaj ntawv pov thawj tias lawv twb muaj hauj lwm ua los yog lawv ua hauj lwm rau lawv tus kheej thaum raug kev puas tsuaj. Yog hais tias pub tsis tau ntawv ua pov thawj txog kev ua hauj lwm ntawd thaum tso npe, ces neeg muaj 21 hnub txij thaum hnub ntawd kom thiaj pub cov ntawv pov thawj no. Yog tsis xa cov ntawv no tuaj ua ntej dhau 21 hnub ces qhov tso npe yuav raug xyeej yuav tsis txais txiaj ntsig DUA, thiab cov txiaj ntsig uas twb them lawm los yuav tsub rov qab. Cov tib neeg yuav tsum them rov qab cov nyiaj no.

Cov Lus Kaw

  1. Yog ib lub xub Qhab txais kev tshaj tawm ntawm Tus Thawj Tswj Hwm rau lub teb chaws uas muaj kev Pab Tib Neeg (IA), pub cai rau DUA, thiab txais kev pom zoo, ces lub khoos kas DUA yuav tswj hwm dhau lub xeev uas lub xub nyob rau haud. Cov nyiaj uas pub no yog dhau lub koom haum poob hauj lwm uas tswj hwm kev poob hauj lwm rau sawv daws.
  2. Txawm yog peb qhia hais tias yuav tsum xa ntawv tso npe ua ntej dhau 30 hnub mas, tej zaum U.S. Department of Labor yuav muab hnub kawg txav kom ntev zog. Cov neeg dim yuav tau sib sab laj nrog lawv lub zos qhov chaw tswj hwm kev poob hauj lwm kom paub tseeb txog hnub kawg kom thiaj tso npe.
Tags:
Hloov tshiab