Lus xaiv teb

Cov lus xaiv thiab cov ntaub ntawv uas qhia tsis tseeb kis tau mus sai sai tom qab raug kev puas tsuaj. Tom qab cov cua daj cua dub Helene thiab Milton, peb tau pom ntau yam lus cuav uas tej zaum yuav cuam tshuam kev pab rov zoo los yog thaiv neeg kom thiaj tsis txais kev pab sai li sai tau.

Pab koj tus kheej, koj tsev neeg, thiab koj lub zej zog nyab xeeb thaum paub txog tej lus paj lus cua thiab lus xaiv es kuj faib tau ntaub ntawv tseeb los ntawm tej qho chaw uas ntseeg tau. Koj nyeem tau ntaub ntawv tseeb txog cov cua daj cua dub ntawm no: Hurricane Helene thiab Hurricane Milton.

Muaj peb yam yooj yim uas koj ua tau kom pab cov lus xaiv thiaj tsis kis mus:

  1. Nrhiav ntaub ntawv los ntawm tej qho chaw uas ntseeg tau. 
  2. Faib cov ntaub ntawv los ntawm tej qho chaw uas ntseeg tau. 
  3. Hais kom lwm leej lwm tus txhob faib cov ntaub ntawv los ntawm tej qho chaw uas ntseeg tsis tau. 

Lus Xaiv

Lus xaiv: Yog xa ntawv mus rau lub koom haum tuav pov hwm vim raug dej nyab ces yuav txiav txim siab tias lub vaj tse tau raug puas tsuaj ntau.

Qhov no tsis muaj tseeb. Qhov uas xa ntawv mus rau lub koom haum tuav pov hwm vim raug dej nyab tsis txhais hais tias lawv yuav txiav txim siab tias raug puas tsuaj ntau dhau lawm. Cov nom tswv hauv koj lub zej zog yuav kuaj kev raug dej nyab rau hauv koj lub tsev kom thiaj txiav txim siab txog qhov puas tsuaj no, ib lub tsev dhau ib lub tsev.

FEMA yaum kom txhua tus neeg uas muaj kev tuav pov hwm rau dej nyab uas twb raug dej nyab kom thiaj xa ntawv thov nyiaj rau tej ntawd. Qhov uas muaj kev puas tsuaj ntau npaum li cas YUAV TSIS hloov qhov nyiaj ntau uas yuav them rau cov neeg uas muaj kev tuav pov hwm rau dej nyab National Flood Insurance Program (NFIP). Lub koom haum NFIP yuav them rau tag nrho tej kev puas tsuaj uas koj tsab cai tuav povhwm thiaj duav.

Lus xaiv: Yog txiav txim siab tias kuv lub tsev tau “raug puas tsuaj ntau heev”, ces kuv tsuas txais 50% ntawm tus nqi uas yuav tsum them kom kho kev puas tsuaj ntawd ntawm Lub Khoos Kas Tuav Pov Hwm Rau Dej Nyab.

Qhov no tsis muaj tseeb. Qhov uas txiav txim siab tias ib lub tsev twg raug puas tsuaj ntau heev YUAV TSIS hloov qhov nyiaj uas koj yuav txais thaum xa ntawv thov nyiaj pab ntawm koj tsab cai Tuav Pov Hwm Rau Dej Nyab (NFIP). Lub koom haum NFIP yuav them tus nqi rau tag nrho ib puas tsav yam uas koj tsab cai duav.

Tej tus neeg uas muaj tsab cai tuav pov hwm uas muaj ib lub tsev uas raug puas tsuaj ntau heev lawv yuav txais nyiaj ntxiv dhau kev pov hwm Nqi Siab Zog Kom Coj Raws Cai kom pab lawv kho lawv lub tsev kom coj raws li cov ntsiab cai rau kev txua tsev. Tiv tauj mus rau koj lub koom haum tuav pov hwm rau dej nyab kom thiaj kawm ntxiv.

Lus xaiv: FEMA yuav muab kuv lub tsev rhuav pov tseg yog hais tias tus nqi rau kev puas tsuaj yuav ntau tshaj 50% ntawm kuv lub tsev qhov muaj nqi.

Qhov no tsis muaj tseeb. FEMA yeej tsis rhuav tej tsev pov tseg los yog qhia hais tias nyob tsis taus rau hauv lub tsev. Twb yog cov nom tswv hauv zej zog uas saib xyuas kev txua tsev rau hauv tej qho chaw uas muaj feem raug dej los nyab.

Yog koj lub zej zog tau koom Lub Khoos Kas Tuav Pov Hwm Rau Dej Nyab thiab cov nom tswv txiav txim siab tias koj lub tsev raug puas tsuaj ntau heev, ces tej zaum koj yuav tsum ua ntau yam thiaj kho tau kom coj raws li cov ntsiab cai txua tsev. Ntau lub zej zog txib kom ua li no thaum twg tus nqi kho koj lub tsev twb ntau tshaj 50% ntawm lub tsev ntawd qhov muaj nqi. Txawm li ntawd los, koj yuav tsum nug koj cov nom tswv txua tsev rau hauv zej zog kom thiaj kawm ntaub ntawv txog koj qhov chaw nyob. Peb yaum kom mus saib qhov vev xaib rau koj lub zos los yog lub cheeb tsam rau cov ntaub ntawv tiv tauj.

Qhov uas rov qab txua tsev kom coj raws li cov ntsiab cai txua tsev yeej tseem ceeb vim yuav pab tiv thaiv lub vaj tse kom txhob raug dej nyab dua.

Lus xaiv: Cov kws kho fai fab uas nquag ua hauj lwm kho fai fab nyob hauv lub xeev North Carolina lawv tsum tsis ua hauj lwm vim FEMA tsis tau them lawv tau ntau lub lim tiam.

Qhov no tsis muaj tseeb. FEMA tsis them nyiaj rau cov kws kho fai fab. Cov koom haum fai fab twb yog cov uas them nyiaj mus rau cov neeg ua hauj lwm thiab cov neeg lav ua hauj lwm.

Qee zaus, FEMA yuav pub nyiaj rov qab rau tej lub zos me me cov tuam txhab koom tes ua ke rau lawv tej nqi thaum pab tseem fwv vim raug kev puas tsuaj dhau cov nyiaj Pab Rau Pej Xeem, tiam sis FEMA yeej yuav tsis them cov neeg ua hauj lwm ncaj qha. Cov koom haum uas ntiag tug tswv lawv tsis tsim nyog txais cov nyiaj Pab Rau Pej Xeem.

Lus xaiv: FEMA tau txhim tsa tej qho chaw ruaj khov uas nyob ze cov chaw raug puas tsuaj ua ib co “FEMA lub xum” kom thiaj ntes tib neeg los yog saib peb cov neeg ua hauj lwm kom tseem ceeb dua cov neeg dim kev puas tsuaj.

Tag nrho ib puas tsav yam no tsis muaj tseeb. Cov lus xaiv txog “FEMA lub xum” tsuas yog lus dag kom tib neeg tsis pom hais tias peb nquag ua hauj lwm pab cov neeg dim kev puas tsuaj. FEMA yeej tsis ntes tib neeg, tsis yog tub ceev xwm, tsis tau txhim tsa ib lub xum, thiab yeej tsis tau nyiag kev khiav kev khawb av nrhiav nyiaj kub.

Muaj coob tug neeg pab thiab neeg dim kev puas tsuaj uas toob kas ib qho chaw nyob tom qab raug ib qho kev puas tsuaj. FEMA tau txhim tsa ib co chaw rau neeg pab nyob uas nyob ze cov chaw raug kev puas tsuaj kom cov neeg pab thiaj muaj chaw nyob ze cov zej zog uas peb tab tom pab thiab tsis tas nyob hauv tsev so los yog cov tsev ntawm cov neeg dim kev puas tsuaj. Kawm ntxiv txog txoj kev uas FEMA pab txhawb nqa cov neeg dim nrhiav tsev nyob.

Ua ib feem ntawm FEMA txoj kev pab lub xeev North Carolina sab hnub poob tom qab raug Cua Daj Cua Dub Helene, FEMA tau txhim tsa ob peb qho chaw rau cov neeg pab nyob. Txog ntua thaum Lub Kaum Hli Ntuj Tim 23, 2024, muaj ntau tshaj 1,600 FEMA cov neeg ua hauj lwm rau hauv lub xeev. Cov chaw rau cov neeg pab nyob no mas tsuas yog rau cov tib neeg uas pab txhawb nqa cov chaw uas raug kev puas tsuaj nkaus xwb es tsis siv rau lwm lub hom phiaj. Raws li peb ib txwm ua hauj lwm, cov chaw no muaj tub ceev xwm uas mus ib puag ncig tiv thaiv cov neeg nyob rau haud.

Lus xaiv: FEMA tau rho tawm ntawm cov chaw raug cua daj cua dub hauv lub xeev North Carolina vim muaj neeg hawv peb.

Qhov no tsis muaj tseeb.

Peb tau siv zog ua hauj lwm kom tiv thaiv peb cov neeg ua hauj lwm thiab cov neeg uas peb xav pab kom thiaj nyab xeeb, es peb tseem nquag txhawb nqa cov zej zog uas raug ntawm cua daj cua dub Helene.

Thaum Lub Kaum Hli Ntuj Tim 12, 2024, FEMA tau kawm paub txog tej kev hawv rau peb cov neeg ua hauj lwm rau hauv lub xeev North Carolina. Peb tau txiav txim siab pauv peb txoj kev tshaj moo seb leej twg xav tau kev pab es thaum i peb tau mus ncig khob qhov rooj tiam sis ziag no peb muaj tej pawg neeg uas nyob hauv tej qho chaw rau hauv zej zog uas lawv tseem ntsib tau thiab pab tau cov neeg dim kev puas tsuaj kom lawv thiaj tseem txais kev pab. Peb tau txiav txim siab ua li no kom paub tseeb tias FEMA cov neeg ua hauj lwm thiaj nyab xeeb thiab lawv tsom ntsoov pab cov neeg dim kev puas tsuaj tau.

Peb tau ua hauj lwm nrog cov tub ceev xwm hauv zej zog thiab lub xeev thaum txiav txim siab ua li no thiab peb tau tshaj tawm thaum Lub Kaum Hli Ntuj Tim 14 hais tias FEMA tej pab pawg yuav rov qab mus khob qhov rooj pab cov neeg dim.

FEMA yuav yeej meem soj ntsuam tej kev hawv no thiab pauv peb txoj kev ua hauj lwm thaum tsim nyog pauv.

Lus xaiv: FEMA thaiv neeg thiab cov koom haum kom thiaj tshem tsis tau khoom khib nyiab rau hauv tej qho chaw uas raug kev puas tsuaj ntawm qhov cua daj cua dub.

Qhov no tsis muaj tseeb.


FEMA tsis tau thaiv los yog cuam tshuam kev tshem khoom khib nyiab, uas twb yog lub zej zog cov tub ceev xwm uas saib xyuas. FEMA tsis muaj dej num tshem khoom khib nyiab, tsis ntiav neeg tshem khoom khib nyiab, thiab tsis tswj hwm cov chaw tso khib nyiab. Qhov uas FEMA ua tau yog pub nyiaj rov qab rau cov tseem fwv ntawm lub zej zog, lub xeev los yog lub xub Qhab rau lawv cov nqi tshem khoom khib nyiab ntawm cua daj cua dub.

Yog tias koj tau raug ntawm ib qho cua daj cua dub thiab xav paub seb koj yuav tshem khoom khib nyiab ntawm koj lub vaj tse li cas, nug koj lub cheeb tsam lub zej zog los yog lub zos lub zej zog rau lawv cov lus qhia. Tej zaum cov koom haum pab dawb uas ua hauj lwm rau hauv koj qhov chaw pab tau thiab. Kawm ntxiv: 9 Txoj Kev Kom Thiaj Nyab Xeeb Thaum Tshem Khoom Khib Nyiab Tom Qab Raug Kev Puas Tsuaj.

Lus xaiv: FEMA tswj hwm los yog saib xyuas cov chaw tso khoom khib nyiab thiab cov ntawv lav ua hauj lwm tshem khoom khib nyiab.

Qhov no tsis muaj tseeb.

FEMA tsis ntiav neeg, tsis tswj hwm los yog saib xyuas tej hauj lwm ntawm neeg ntiav ua hauj lwm tshem khoom khib nyiab tom qab cua daj cua dub. FEMA tsis tswj hwm los yog saib xyuas cov chaw tso khoom khib nyiab tso pov tseg. Qhov uas FEMA ua tau yog pub nyiaj rov qab rau cov tseem fwv ntawm lub zej zog, lub xeev los yog lub xub Qhab rau lawv cov nqi tshem khoom khib nyiab ntawm cua daj cua dub. Txawm li ntawd los, peb tsis muaj cuab kav hloov txoj cai rau hauv zej zog txog kev tshem khoom khib nyiab uas tej zaum tswj hwm cov chaw tso khoom khib nyiab tso pov tseg thiab cov ntawv lav ua hauj lwm.

Lus xaiv: FEMA yuav pub $1200 rau koj yam koj tsis tas ua dab tsi yog tias koj tsis tau muaj fai fab tau 24 teev.

Kab lug no tsis muaj tseeb tag nrho.

Kom thiaj saib seb koj tsim nyog txais kev pab zoo li cas, mus saib DisasterAssistance.gov los yog hu mus rau 1-800-621-3362 kom thiaj tso npe. Thaum tso npe no, yuav nug koj txog seb qhov puas tsuaj puas ntsoog tau raug koj li cas. Yuav tshaj xyuas koj qhov tso npe thiab peb yuav xa moo tuaj rau koj txog kev pab uas koj tsim nyog txais thaum tab tom tshaj xyuas. Tej hom kev pab yuav los ntxov dua lwm hom. Koj saib tau seb koj qhov tso npe nyob rau theem twg thaum nkag npe rau hauv DisasterAssistance.gov los yog thaum hu mus rau 1-800-621-3362.

Lus xaiv: FEMA thaiv neeg kom lawv thiaj dim tsis tau lub xeev Florida.

Qhov no tsis muaj tseeb.

FEMA tsis thaiv neeg hauv lub xeev Florida kom lawv khiav dim tsis tau. FEMA tsis tswj xyuas cov tsheb kev mus los thiab tsis hais kom tsheb nres, tsuas yog cov tub ceev xwm uas ua tau li no xwb. Nov yog ib kab lug xaiv phom sij uas mob tau tib neeg heev.

Yog koj nyob ntawm lub xeev Florida sab hnub poob thiab ntawm ntug dej hiav txwv, koj yuav tsum sawv kev hlawv hlo los tiv thaiv koj tus kheej thiab cov uas koj hlub. Ua raws li cov lus qhia ntawm cov nom tswv hauv zej zog. Yog lawv hais kom koj khiav dim mus, ces ua kiag tam sim ntawd. Yog tias laug lub sij hawm khiav dim mus ces koj thiab lwm tus lub neej thiaj muaj kev pheej hmoo raug.

Cov nom tswv hauv zej zog yog cov uas paub zoo tshaj txog kev khiav dim mus thiab cov chaw pab. Kawm ntxiv nyob ntawm no: Cua Daj Cua Dub Milton | Florida Kev Puas Tsuaj.

Hloov tshiab
Rov qab mus rau saum